Մեկնարկեց ՍԾՏՀ-ում Բուլղարիայի Հանրապետության նախագահությունը

29 հունվարի, 2014

Ս. թ. հունվարի 23-ին Ստամբուլում, Սևծովյան տնտեսական համագործակցության կազմակերպությունում Բուլղարիայի նախագահությամբ տեղի ունեցավ ՍԾՏՀ Նախագահության, Ավագ պաշտոնյաների կոմիտեի, Հարակից կազմակերպությունների և ՍԾՏՀ Մշտական միջազգային քարտուղարության համակարգող նիստը:

Նիստի օրակարգն ընդգրկում էր ՍԾՏՀ-ում Բուլղարիայի նախագահության առաջնայնությունների, ինչպես նաև նախագահության ընթացքում կազմակերպության շրջանակում նախատեսված միջոցառումների հստակեցման և անցկացման հետ կապված հարցերը:

Նախագահության առաջնայնությունները պայմանավորված են նախագահության լոգոյով` “Better Synergy for Enhanced Competitiveness”. միջազգային ներդրումների խրախուսման և գործարար շրջանակների ներգրավման նպատակով ՍԾՏՀ անդամ-երկրների միջև բազմակողմ համագործակցության խթանում և նախագծային օրակարգի զարգացում, ՍԾՏՀ տնտեսական նոր օրակարգով պայմանավորված կազմակերպության արդյունավետության, ինչպես նաև միջազգային ասպարեզներում ՍԾՏՀ դերի և հեղինակության բարձրացում, ՍԾՏՀ և միջազգային և տարածաշրջանային այլ կազմակերպությունների, գլխավորապես, Եվրամիության, ինչպես նաև ՍԾՏՀ դիտորդների և բնագավառային երկխոսության գործընկերների հետ համագործակցության խթանում:

Նշվեցին նախագահության առաջնային խնդիրները, մասնավորապես, տրանսպորտի, երիտասարդության և սպորտի, տեղեկատվական և հեռահաղորդակցական տեխնոլոգիաների, առողջապահության, գյուղատնտեսության և կազմակերպված հանցավորությունների դեմ պայքարի բնագավառներում: Կարևորվեց Սևծովյան տարածաշրջանի գործարար շրջանակների միջև, մասնավորապես, փոքր և միջին ձեռնարկատիրության բնագավառում համագործակցության խթանման անհրաժեշտությունը:

Նիստի նախօրեին, հունվարի 22-ին, Ստամբուլում տեղի էր ունեցել ՍԾՏՀ “Troika” ձևավաչափով կեսօրյա հանդիպումը (Հայաստան, Բուլղարիա, Հունաստան) ՍԾՏՀ հարակից կազմակերպությունների պատասխանատուների և քարտուղարության ներկայությամբ, որի մասնակիցները ոչ-ֆորմալ ձևաչափում նախնական քննարկումներ էին անցկացրել Բուլղարիայի կողմից ներայացված միջոցառումների ցանկի շրջանակում, ինչպես նաև ՍԾՏՀ և հարակից կազմակերպությունների միջև գործնական համագործակցության հետագա զարգացման հետ կապված հարցերի վերաբերյալ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր