ՀՀ ՓՄՁ սեկտորի մասին պրեզենտացիա ՍԾՏՀ կենտրոնակայանում

29 մայիսի, 2019

2019թ․ մայիսի 29-ին ՍԾՏՀԿ կենտրոնակայանում անցկացված կազմակերպության փոքր և միջին ձեռնարկատիրության հարցերով աշխատանքային խմբի հանդիպման շրջանակներում ՀՀ պատվիրակության կողմից ներկայացվեց ՓՄՁ-ների զարգացման հարցում Հայաստանի փորձը:

Պրեզենտացիայի սկզբում հակիրճ ներկայացվեց ՓՄՁ-ների խրախուսման ՀՀ քաղաքականությունը, Հայաստանի Փոքր և միջին ձեռնարկատիրության զարգացման ազգային կենտրոնի գործունեությունը, որն ուղղված է ՓՄՁ-ների գործունեության արդյունավետության և մրցունակության բարձրացմանը, ՓՄՁ-ների համար բիզնեսի զարգացման ծառայությունների մատչելիության և ֆինանսական ռեսուրսների հասանելիության ապահովմանը, նորարարական ծրագրերի աջակցությանը, ՓՄՁ-ների գործունեության միջազգայնացմանը:

Պրեզենտացիայի երկրորդ մասում ներկայացվել է Հայաստանում առաջին հանրօգուտ և սոցիալական ձեռներեցության զարգացման ուղղվածություն ունեցող ձեռնարկությունների աքսելերատորի՝ ImpactAim-ի հիմնադրման գաղափարն ու գործունեությունը: ՄԱԶԾ հայաստանյան գրասենյակի կողմից ստեղված հանրօգուտ ներդրումների (impact investment) աքսելերատորը նորարարական նախաձեռնություն է, որի նպատակը ՄԱԶԾ-ի գլոբալ ցանցի և փորձի կիրառմամբ սոցիալական ձեռներեցության ու հանրօգուտ ուղղվածություն ունեցող ընկերությունների՝ ներառյալ ՓՄՁ-ների և սթարթափերի ազդեցության մեծացումն է ՀՀ-ում և այլ երկրներում՝ կայուն զարգացման նպատակներին հասնելու համար:

Ավարտին ՀՀ պատվիրակությունը մատնանշեց հանրօգուտ ներդրումների և սոցիալական ձեռներեցության ոլորտում ՍԾՏՀ անդամ պետությունների և ձեռնարկությունների՝ մասնավորապես ՓՄՁ-ների և սթարթափերի միջև համագործակցության կարևորությունը, որի արդյունքում նորարարական հանրօգուտ նախագծերը կարող են կիրառվել նաև տարածաշրջանի մյուս երկրներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր