ՀՀ պատվիրակության մասնակցությունը ՍԾՏՀԿ ԱԳՆԽ 40-րդ հանդիպմանը

28 հունիսի, 2019

2019թ. հունիսի 28-ին Սոֆիայում կայացավ Սևծովյան տնտեսական համագործակցության կազմակերպության (ՍԾՏՀԿ) անդամ պետությունների ԱԳ նախարարների խորհրդի (ԱԳՆԽ) 40-րդ հանդիպումը, որին մասնակցեց ՀՀ պատվիրակությունն ԱԳ նախարարի տեղակալ Արտակ Ապիտոնյանի ղեկավարությամբ։ Պատվիրակության կազմում էին նաև ԲՀ-ում ՀՀ դեսպան Արմեն Սարգսյանը և ՍԾՏՀ-ում ՀՀ մշտական ներկայացուցիչ Սահակ Սարգսյանը։

Հանդիպումը վարում էր ՍԾՏՀԿ նախագահող երկիր՝ Բուլղարիայի փոխվարչապետ և ԱԳ նախարար Եկատերինա Զահարիևան։

Իր ելույթում փոխնախարար Ապիտոնյանն ներկայացրեց վերջին շրջանում ՀՀ ներքին ժողովորդավարական զարգացումները և կառավարության վերակազմավորման և օպտիմալացման գործընթացը։

Շեշտելով տարածաշրջանում ներառական տնտեսական համագործակցության կարևորությունը՝ ՀՀ ԱԳ փոխնախարարն անդրադարձավ տարածաշրջանում գոյություն ունեցող տրանսպորտային ուղիների և ենթակառուցվածքների արդյունավետ օգտագործման ու դրանց ընդլայման անհրաժեշտությանը, ինչը հատկապես կարևոր է ցամաքով շրջապատված պետությունների համար տարանցիկ ուղիների միջոցով դեպի ծով ազատ և անխափան ելք ապահովելու առումով։ Նա նշեց, որ աշխարհում կան բազմաթիվ հաջողված օրինակներ, երբ
անդրսահմանային առևտուրը և տնտեսական նախագծերն օգնել են վերականգնելու ժողովուրդների և գործարար շրջանակների միջև կապերը՝ նպաստելով կայունության և խաղաղության համար նպաստավոր միջավայրի ստեղծմանը:

Ապիտոնյանը մասնակիցներին տեղեկացրեց ս.թ. հոկտեմբերին Երևանում անցկացվելիք ՏՏ ոլորտի համաշխարհային 23-րդ կոնգրեսի (WCIT 2019) մասին և ընդգծեց, որ ՀՀ-ն որպես տեղեկատվական և հաղորդակցման տեխնոլոգիաների ՍԾՏՀ աշխատանքային խմբի համակարգող երկիր հիշյալ կոնգրեսի շրջանակներում նախատեսում է կազմակերպել ՍԾՏՀ երկրների համար հարակից միջոցառում, ինչը կարող է նպաստել խնդրո առարկա ոլորտում տարածաշրջանային համագործակցության զարգացմանը։

Փոխնախարար Ապիտոնյանն ընդգծեց, թե կազմակերպության գործունեությունը քաղաքականացնելու և քաղաքական առճակատման հարթակ դարձնելու ՍԾՏՀԿ որոշ անդամ երկրների փորձերն անընդունելի են, հակասում են ՍԾՏՀԿ կանոնադրությանը և խարխլում կազմակերպության հեղինակությունը՝ որպես արդյունավետ տարածաշրջանային տնտեսական կառույց:

Իր ելույթում ՀՀ ԱԳ նախարարարի տեղակալն անդրադարձավ նաև ՍԾՏՀԿ օրակարգային այլ հարցերի՝ ներառյալ ՍԾՏՀԿ բարեփոխումներին և կազմակերպության արդյունավետության բարձրացմանը։

ԱԳՆԽ-ի 40-րդ հանդիպման արդյունքում ընդունվեցին բանաձևեր, որոշումներ և առաջարկություններ՝ ներառյալ ՍԾՏՀ-ում Հյուսիսային Մակեդոնիայի անդամակցության վերաբերյալ։ Ավարտին տեղի ունեցավ ՍԾՏՀԿ-ում նախագահության՝ Հունաստանին փոխանցման արարողություն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր