Արամ Խաչատրյանի ծննդյան 120-ամյակին նվիրված մշակութային միջոցառումներ ՍԾՏՀ-ում ՀՀ մշտական ներկայացուցչության հովանու ներքո

13 հոկտեմբերի, 2023

Ս.թ. սեպտեմբերի 20-ին Ստամբուլի «Փերա» թանգարանում տեղի է ունեցել աշխարհահռչակ կոմպոզիտորին նվիրված պանելային քննարկում, որին նույն վայրում հաջորդել է մշտական ներկայացուցչության պաշտոնական ընդունելությունը, ինչի ընթացքում դաշնակահար Շահան Արծրունու կողմից կատարվել է Խաչատրյանի դաշնամուրային մի քանի գործ։ Միջոցառմանը ներկա են գտնվել Ստամբուլում հավատարմագրված մի շարք պետությունների գլխավոր հյուպատոսներ, հյուպատոսական կորպուսի այլ ներկայացուցիչներ, ՍԾՏՀԿ գլխավոր քարտուղարը (ԳՔ), Կազմակերպության քարտուղարության պաշտոնյաներ, Ստամբուլի ՏԻՄ-երի, պոլսահայ համայնքի ներկայացուցիչներ, արվեստագետներ և մեծաթիվ այլ հյուրեր։ Սեպտեմբերի 21-ին Ստամբուլի լավագույն հաստատությունների շարքին դասվող «Ջեմալ Րեշիթ Րեյ» համերգասրահում նախատեսված Խաչատրյանի անվան եռյակի և Ստամբուլի ֆիլհարմոնիկ ընկերակցության (կամերային) նվագախմբի համատեղ համերգը հետաձգվել է՝ պայմանավորված Արցախի դեմ ագրեսիայի հետևանքով ստեղծված իրավիճակով։

Ընդգծելով ժողովուրդներին միմյանց կամրջելու և մշակութային կապերի ամրապնդման գործում երաժշտության և արվեստի կարևորությունը՝ իր ողջույնի խոսքում ՍԾՏՀ-ում ՀՀ մշտական ներկայացուցիչ Ս. Սարգսյանը նշել է, թե միջոցառումները որոշվել էր կազմակերպել՝ վերոհիշյալ համոզմունքով հարգանքի տուրք մատուցելու Խաչատրյանի ժառանգությանը։ Նշելով, որ սույն ձեռնարկը համընկնում է ՀՀ անկախության տոնի հետ, նա ասել է, թե չնայած պատմության ընթացքում բազում մարտահրավերներին՝ հնամյա մշակույթի, կրոնի և լեզվի վրա խարսխված իր ինքնության, ստեղծագործական ձիրքի ու տոկունության շնորհիվ հայ ժողովուրդը վերածնվել է, կառուցել նոր կյանք և վերականգնել իր անկախությունը։ Սարգսյանը հավելել է, թե այս պահին էլ մեր ժողովուրդը կանգնած է հերթական փորձության առջև և վստահություն հայտնել, որ այն ևս կհաղթահարվի։ Ըստ նրա, հանդիսանալով ՍԾՏՀ մշակույթի աշխատանքային խմբի ներկա համակարգող երկիր, Հայաստանը դիտարկում է մշակութային համագործակցության ներուժը որպես տարածաշրջանային բարգավաճման, կայուն զարգացման և խաղաղ համակեցության հասնելու հնարավորություն։

Միջոցառմանը խոսքով հանդես են եկել նաև ՍԾՏՀԿ ԳՔ-ն, «Փերա» թանգարանի տնօրենը, Ստամբուլի ֆիլհարմոնիկ ընկերակցության ղեկավարը, ինչպես նաև ՄՆ-ի կողմից հուշանվերներ են հանձնվել մի խումբ անհատների։ Միջոցառումը լուսաբանվել է պոլսահայ ԶԼՄ-ների կողմից։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր