Մշտական ներկայացուցիչ Նաիրի Պետրոսյանը հանդիպում ունեցավ Global Relations Forum-ի «Հանդիպում դեսպանի հետ» շարքում

04 դեկտեմբերի, 2025

Դեկտեմբերի 4-ին ՍԾՏՀԿ-ում Հայաստանի մշտական ներկայացուցիչ Նաիրի Պետրոսյանը Ստամբուլում կլոր սեղանի շուրջ հանդիպում ունեցավ Համաշխարհային հարաբերությունների ֆորում (Global Relations Forum, GRF) գիտահետազոտական կենտրոնի «Հանդիպում դեսպանի հետ» շարքի (Ambassadors series) շրջանակներում: Հանդիպմանը մասնակցեցին GRF անդամներ, Թուրքիայի մի շարք պաշտոնաթող դեսպաններ, լրագրողներ, վերոնշյալ կառույցի երիտասարդական ցանցի և Թուրքիայի քաղաքացիական հասարակության ներկայացուցիչներ: Հանդիպումը կրեց «Վերջին զարգացումները Հարավային Կովկասում և հարաբերությունները Թուրքիայի հետ» խորագիրը: Հանդիպումը վարեց GRF նախագահ, Թուրքիայում ԵՄ նախկին մշտական ներկայացուցիչ պաշտոնաթող դեսպան Սելիմ Ենելը։

Նաիրի Պետրոսյանը հանդես եկավ ներածական ելույթով՝ խոսելով Հայաստանի տարածաշրջանային քաղաքականության, առկա մարտահրավերների և հնարավորությունների մասին: Նա մասնավորապես շեշտեց, այս տարվա օգոստոսի 8-ի Վաշինգտոնում տեղի ունեցած եռակողմ գագաթաժողովի արդյունքում Հայաստանը և Ադրբեջանը նախաստորագրեցին խաղաղության և միջպետական հարաբերությունների հաստատման մասին համաձայնագիրը, որն ազդարարեց խաղաղության հաստատումը տարածաշրջանում։ Սպիտակ տանը տեղի ունեցած գագաթաժողովի ընթացքում Հայաստանի վարչապետը, Ադրբեջանի նախագահը և Միացյալ Նահանգների նախագահ՝ որպես վկա, ստորագրեցին համատեղ հռչակագիր։ Հայաստանը և Ադրբեջանը համաձայնել են փոխադարձաբար ճանաչել միմյանց ինքնիշխանությունը, տարածքային ամբողջականությունը, սահմանների անձեռնմխելիությունը և հարգել մեկմեկու ազգային իրավազորությունը։ Սրանք ընդհանուր սկզբունքներ են, որոնց շրջանակներում պետք է ապաշրջափակվեն տրանսպորտային ենթակառուցվածքները։ Առաջընթացը պահանջում է համբերություն, հոգատարություն, գործնական հարցերի լուծում և փոխադարձ վստահության կառուցում։ Հայաստանը հանձնառու է բարեխղճորեն ներգրավվելու մեր տարածաշրջանը կառուցողական համագործակցության տարածքի վերածելուն։

Ելույթից հետո ծավալվեց ակտիվ քննարկում՝ հարցուպատասխանի ձևաչափով:

GRF-ը դիվանագիտական շրջանակներում լայն ճանաչում ունեցող անկախ, ոչ կառավարական և ոչ առևտրային հարթակ է, որը միավորում է դիվանագետների, միջազգային ոլորտի պատասխանատուների, համալսարանական և գիտական շրջանակների ներկայացուցիչների, ինչպես նաև առաջատար գործարարների, ֆինանսական ոլորտի պատասխանատուների, հետազոտողների, արվեստագետների և լրագրողների։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր